Dende o Equipo de Dinamización da Lingua Galega

poñemos en marcha esta campaña co obxectivo de pór en valor a nosa lingua no ámbito da conservación-restauración do patrimonio cultural.

Bases para a elección da palabra do ano

1. Obxecto da campaña
   Promover o emprego e visibilidade de termos galegos vinculados á conservación-restauración e ó patrimonio material e inmaterial.
2. Participación
   Pode participar calquera persoa interesada en difundir e fortalecer o vocabulario galego propio do sector. Esta participación pode ser directamente na escola ou ben a través das súas redes sociais.
3. Procedemento de participación
   As persoas participantes a través das redes sociais deberán deixar a súa palabra nos comentarios desta campaña e dende a Escola encargarémonos de colgala na árbore das palabras. As persoas participantes da escola deberán colgar na “árbore das palabras” unha folla na que escribirán a palabra proposta. Debe ser unha palabra do ámbito da conservación-restauración ou relacionada co patrimonio cultural.
4. Prazo de presentación de propostas
   O prazo para achegar as vosas propostas permanecerá aberto ata o 19 de decembro.
5. Selección final
   Unha vez rematado o prazo, o equipo de dinamización da lingua galega realizará unha selección de tres palabras finalistas entre todas as propostas recibidas. Para a dita selección terase en conta a orixinalidade e que as palabras sexan propias do galego e non existan en castelán (ou teñan un uso ou significado claramente diferenciado). Estas tres palabras serán sometidas a unha votación pública durante o mes de xaneiro, da que sairá “A nosa palabra do ano”.
6. Resultados
   A palabra gañadora anunciarase unha vez rematada a votación e difundirase a través das redes sociais e con carteis na escola.